Bazterkeria digitala COVID garaian

Iturria // Argia

Esteka // https://www.argia.eus/argia-astekaria/2760/teknologia

Bizitza aurrera ateratzea eta bizitza bera gozatzea da askoren espektatiba handiena. Ongizate hori mantentzeak, sortu dugun gizarte honetan, kudeaketa asko egitea suposatzen du ordea, erakunde publiko zein pribatuekin. Eta hori askok ez dugu oraindik behar bezala barneratuta. Eraldaketa digitalak aurrera darrai, eta ondorioz kudeaketak egiteko moduak. Gaurkoan administrazioaren eraldaketa digitalak ekarri dituen zenbait arazotan jarriko dut begirada, arrisku egoeran dauden pertsonekin lan egiten duten oinarrizko esku-hartze zerbitzuetan ikusiak.

COVIDa hasi zenetik erakunde publikoen arreta zerbitzua aldatu egin da, aurrez aurreko arreta eredua desagertzen ari da, eta beste aldean pertsona bat aurkitzeko zenbait prozesu digital egin behar dituzu: aurretiko hitzorduak, aurretiko galdetegiak, autokudeaketak… Pertsona gutxiago, prozesu automatizatu gehiago. Baina bitartean gure gizartean errealitate ugari ditugu: irakurtzen ez dakien jendea, modu irregularrean dagoen jendea eta datu baseetan ez dagoena, hizkuntza ulertzen ez duena… Bestalde, askok ez du ulertzen administrazioaren antolaketa konpetentzia ezberdinen kudeaketari lotua (lana, segurtasun soziala, ogasuna, osasuna, hezkuntza…). Zelan egiten dituzte kudeaketak orduan bazterkeria egoeran daudenek? Kasu batzuetan, euren arazoa negozio bide duten pertsona eta erakundeengana joaz, hau da, kudeaketak egiteko kobratzen dutenengan: COVID ziurtagiria lortzeko, BAKQ edo Cl@ave ziurtagiriak lortzeko… dakartzan segurtasun arriskuekin.

Beste askok oinarrizko esku-hartze zerbitzuetara jotzen du. Konfiantzazko pertsona baten laguntza bilatzen dute. Eragile hauek administrazioarekin kudeaketa digitalak egun batetik bestera euren lanetara gehitu direla ohartzen hasi direlarik, pertsonen arteko arretaren beharra ez da COVIDarekin desagertu, lekuz aldatu da. Arazoak marjinala dirudi gure gizarte handian, baina handia da bazterkeria arriskuan dauden pertsonentzat eta eragile hauentzat. Pertsonak eta bizitza erdigunean jarriko dituen digitalizazio eredu baten bidean lan egin behar dugu.

Irudia // Knapwurst had resumed reading //
Lizentzia // Domeinu publikoa // // https://www.oldbookillustrations.com/illustrations/knapwurst-reading/

Erantzun bat utzi

Zure e-posta helbidea ez da argitaratuko. Beharrezko eremuak * markatuta daude